शिरवाडे फाटा येथे स्विफ्ट कार मोटारसायकल अपघातात युवक ठार
*भरवस फाटा ते शिर्डी रोडवरील भीषण अपघात*
शरद लोहकरे, लासलगाव…
भरवस फाटा ते शिर्डी राज्य मार्गावर रात्री १२.३० च्या दरम्यान शिरवाडे फाटा येथे स्विफ्ट कार व मोटारसायकल अपघातात एक युवक ठार तर एक जबर जखमी झाला.
सविस्तर माहिती अशी की, आज रात्री १२.३० वाजेच्या दरम्यान आश्वी उंबरी ता.संगमनेर येथील मारुती स्विफ्ट कार एम.एच २० सी.एस ०२०२ ही सोनेवाडी बु.येथे दर्शन घेऊन भरवस फाट्याकडून कोळपेवाडीकडे जात असतांना बजाज अव्हेंजर एम.एच १५ एफ.आर १९०६ या मोटारसायकल व स्विफ्टची जोरदार धडक झाली. त्यात मोटारसायकल वरील दिपक सुधाकर टोपे वय ३५ रा.पिंपळद ता.चांदवड याचा पाय तुटून जोरदार रक्तश्राव झाल्याने उपचारासाठी नेत असतांना दिपकचा मृत्यू झाला. रोहित नामदेव लामखडे वय २५ रा.दरसवाडी ता.चांदवड हा जबर जखमी झाला असून नाशिक येथील खाजगी रुग्णालयात उपचार घेत आहे. पो.पा.रामनाथ तनपुरे यांनी घटनेची माहिती लासलगाव पोलीस ठाण्यात कळवली. स.पो.नि भास्कर शिंदे यांचे मार्गदर्शनाखाली पो.ना.संदीप शिंदे, औदुंबर मुरडनर अधिक तपास करीत आहेत.
*रुग्णवाहिका वेळेत न पोहोचल्याने दीपकला गमवावे लागले प्राण*
या अपघातात दिपकचा पाय तुटून रक्तश्राव होत होता. याप्रसंगी उपस्थितांनी १०८ सह परिसरातील सर्वच रुग्णवाहिकांना फोन करूनही तब्बल दीड तास एकही रुग्णवाहिका आली नाही त्यामुळे उपचाराअभावी पायातून जोरदार रक्तश्राव होऊन दिपकचा दुर्दैवी मृत्यू झाला.
