“विद्यार्थ्यांसोबत रांगेत बसून तहसीलदारांनी अनुभवला पोषण आहाराचा स्वाद!”
“विद्यार्थ्यांसोबत रांगेत बसून तहसीलदारांनी अनुभवला पोषण आहाराचा स्वाद!”
शरद लोहकरे, लासलगाव…
प्रशासकीय अधिकाऱ्यांनी लोकसंपर्क वाढवावा आणि तळागाळातील लोकांच्या समस्या समजून घ्याव्यात, असे आवाहन अनेकदा केले जाते. पण निफाडचे तहसिलदार विशाल नाईकवाडे यांनी स्वतः पुढाकार घेत ग्रामीण भागातील विद्यार्थ्यांसोबत एक वेगळा संवाद साधला.केवळ कार्यालयीन मर्यादेत राहण्यापेक्षा ते थेट जिल्हा परिषद शाळेत जाऊन विद्यार्थ्यांच्या जीवनाचा एक भाग झाले.त्यांच्या या अनोख्या भेटीने चर्चेचा विषय निर्माण झाला.
◆ हसत-खेळत तहसीलदारांची शाळेला भेट…
विशाल नाईकवाडे हे गुरुवार दि १३ फेब्रुवारी रोजी निफाडच्या शेवटच्या गावातील अचानक शाळेच्या आवारात पोहोचले तेव्हा विद्यार्थ्यांच्या डोळ्यांत आश्चर्य दिसले.सरकारी अधिकाऱ्यांना सहसा फाईलींमध्ये आणि मिटिंगमध्ये पाहण्याचीच सवय असते.पण एखादा वरिष्ठ अधिकारी थेट आपल्या शाळेत आला,तोही गप्पा मारत,हसत-खेळत,यामुळे मुलांचे कुतूहल वाढले.
शाळेची पाहणी करताना त्यांनी विद्यार्थ्यांशी त्यांची शैक्षणिक स्वप्ने, अडचणी आणि आवड याबद्दल संवाद साधला.कोणाला डॉक्टर व्हायचं आहे,कोणाला पोलीस,तर कोणाला शिक्षक,मुलांच्या या उत्स्फूर्त संवादाने तहसीलदारही भारावून गेले.शिक्षकांनी शाळेच्या गरजा सांगितल्या आणि विद्यार्थ्यांची परिस्थिती उलगडून दाखवली.
◆ मुलांसोबत थाळीतील स्वाद आणि आत्मीयतेचा स्पर्श….
खरी गोष्ट घडली तेव्हा तहसीलदारांनी विद्यार्थ्यांसोबत मध्यान्ह भोजन करण्याचा निर्णय घेतला.सरकारी पोषण आहार कसा असतो?त्याची गुणवत्ता काय आहे? आणि मुलांना तो कितपत आवडतो?हे प्रत्यक्ष पाहण्यासाठी त्यांनी स्वतः जेवण घेतले.
जेव्हा तहसीलदार मुलांसोबत ताट घेऊन बसले,तेव्हा काही मुलांच्या डोळ्यांत चमक दिसली,काहींनी लाजत-लाजत खाणं सुरू केलं,तर काहींनी मजेत गप्पा मारत पोषण आहारावरच संवाद साधला. “खिचडीभात चांगला शिजला आहे का?”, असे प्रश्न विचारत नाईकवाडे यांनी विद्यार्थ्यांशी संवाद साधला. त्यावर एका चिमुकल्याने “आज पोषण आहार स्पेशल आहे,कारण साहेब आमच्यासोबत आहेत!” असे म्हणून सर्वांना हसवले.
◆ शिक्षण आणि आरोग्य यांचा सुसंवाद
या भेटीदरम्यान त्यांनी विद्यार्थ्यांना रोज शाळेत येण्याची आणि अभ्यासावर भर देण्याची प्रेरणा दिली. शिक्षणासोबतच शारीरिक पोषण हेही तितकेच महत्त्वाचे असल्याचे त्यांनी पटवून दिले. ग्रामीण भागातील मुलांनी केवळ पुस्तकी शिक्षण न घेता, स्वतःच्या आरोग्यावरही लक्ष द्यावे, असा मोलाचा सल्लाही त्यांनी दिला.
◆ मुलांच्या स्मरणात राहणारा दिवस
ही केवळ एका अधिकाऱ्याची शाळा भेट नव्हती, तर ती त्या विद्यार्थ्यांसाठी एक अविस्मरणीय आठवण होती.यानंतर काही मुलांनी असेही सांगितले की, “आम्ही तहसीलदार साहेबांसारखे मोठे व्हायचे आहे!” त्यांच्या या भेटीमुळे विद्यार्थ्यांमध्ये सकारात्मक ऊर्जा संचारली असून, शिक्षणाकडे पाहण्याचा त्यांचा दृष्टिकोन अधिक प्रगल्भ झाला आहे.
तहसीलदारांनी आपल्या सहजसंवादी आणि आत्मीय भूमिकेने प्रशासन आणि विद्यार्थ्यांमधील अंतर मिटवत, एका नवीन युगाची नांदी केली. ते केवळ अधिकारी नव्हते, तर त्या दिवशी ते त्या शाळेच्या एक बापासारखे मार्गदर्शक झाले होते!
प्रशासन आणि समाज यांच्यातील दुवा ठरलेले तहसीलदार…
या भेटीमुळे प्रशासन हा केवळ आदेश देणारा घटक नसून, तो लोकांच्या जिव्हाळ्याचा भाग असतो,याची प्रचिती आली.
या प्रसंगी तहसिलदार विशाल नाईकवाडे, तुकाराम जाधव (गट विकास अधिकारी), प्रशांत बोरसे (विस्ताराधिकारी), विनायक नाथे, मुख्याध्यापिका आशा उगले संतोषी नांदूरकर युवा प्रशिक्षनार्थी सोनाली दराडे आदी उपस्थित होते.
तहसीलदारांनी शाळेला दिलेली भेट केवळ तपासणी नव्हती, तर ती एका कुटुंबप्रमुखासारखी होती. त्यांच्या या आत्मीयतेमुळे विद्यार्थी अधिक आत्मविश्वासाने शिकतील. – आशा उगले (मुख्याध्यापिका, जि.प.शाळा, डोंगरवाडी)
